25ª Clase de IAEE, 4º ESO. 27/11/2020

Retomamos a teoría. Tema novo: A seguridade social.

O mércores que ven, proba sobre os contratos e a negociación colectiva.

A seguridade social (1)

https://www.youtube.com/watch?v=oTmEOovujUE

A constitución española establece que os poderes públicos manterán un sistema de Seguridade Social para toda a cidadanía, que garanta a asistencia e prestacións sociais suficientes ante situacións de necesidade, especialmente en caso de desemprego. A Seguridade Social realiza gastos para manter esta asistencia e obtén ingresos das contribucións dos cidadáns, que pagan parte do seu salario ao sistema, das cotizacións das empresas, e de achegas do propio sector público.

A Seguridade Social guíase polos principios de:

• Suficiencia, que supón garantir un nivel mínimo de protección para toda a cidadanía.

• Contributividade: contribuíndo cunha parte das súas ganancias, cada cidadán sabe que, cumprindo certos requisitos, recibirá unha axuda proporcional ao que foi achegando.

• Universalidade e igualdade de dereitos: toda a poboación ten dereito ás mesmas prestacións.

• Solidariedade: as contribucións dunhas persoas serven para pagar prestacións a outras.
  

  • Solidariedade interterritorial: entre as diferentes partes do país.

  • Solidariedade interxeneracional: as prestacións das/os traballadoras/es actuais serven para pagar as prestacións das/os xubiladas/os.

• Unidade de caixa: as cantidades recibidas por contribucións serven para pagar prestacións en calquera outro territorio.
  

Na Seguridade Social existen diferentes graos de responsabilidade e decisión como en todas as organizacións. Hai persoas ou entidades que ocupan os postos máis altos. O Ministerio de Emprego e Seguridade Social é o primeiro e principal responsable. Despois se atopa a Secretaría de Estado da Seguridade Social e, descendendo, están as Entidades Xestoras, e os Servizos Comúns, unidades dependentes dos niveis superiores. Todos eles integran o sistema da Seguridade Social.